15:21 / 14.03.2017
Ish-kryeministri i Malit të Zi, Milo Gjukanoviq, i ka bërë thirrje Bashkimit Evropian që ta ndalë ndikimin shkatërrues të Rusisë në Ballkan, pas tentim komplotit të parandaluar për t’ia rrëzuar qeverinë e tij pro-perëndimore.
“Moska e ka nisur një lloj lufte kundër Evropës dhe është duke e kërcënuar vetë ekzistencën e Bashkimit Evropian”, ka thënë Gjukanoviq për AP-në.
Gjukanoviq dha dorëheqje pas tentim komplotit të dyshuar rus në tetor të vitit të kaluar për ta parandaluar Malin e Zi që të mos anëtarësohet në NATO.
Prokurorët e Malit të Zi e kanë akuzuar Rusinë dhe operativat e saj të shërbimit sekret për orkestrimin e tentim komplotit ditën e zgjedhjeve, i cili përfshinte edhe vrasjen e Gjukanoviqit.
Megjithatë, Kremlini vazhdon ta mohojë përfshirjen në komplotin e dyshuar, edhe pse haptazi e ka përkrahur dhe financuar partitë nacionaliste opozitare që e kundërshtojnë anëtarësimin e vendit në NATO.