Janë vetëm pesë lojtarë të Juventusit, të cilët nuk janë në shitje për këtë verë dhe Cristiano Ronaldo nuk është njëri prej tyre.
Bianconerët po mendojnë për të ardhmen që pas eliminimit nga Liga e Kampionëve dhe mbetjes larg garës për titullin e Serie A.
Në edicionin e sotëm të La Gazzetta dello Sport raportohet se janë vetëm pesë lojtarë të Zonjës së Vjetër, të cilët janë të paprekshëm nga tregu i transferimeve.
Ata janë: Federico Chiesa, Dejan Kulusevski, Matthijs de Ligt, Arthur dhe Danilo.
Të gjithë të tjerët janë në dispozicion për t’u shitur për çmimin e duhur apo janë pranë përfundimit të karrierës, si Giorgio Chiellini dhe Gianluigi Buffon.
Edhe pse Fabio Paratici vazhdon të thotë se Ronaldo është pjesë e planeve të Juves, rroga e tij prej mbi 30 milionë euro në vit mund ta nxisë idenë për largimin e portugezit.
Pastaj, Paulo Dybala, i cili ka luajtur shumë pak këtë sezon dhe ka kontratë deri në vitin 2022, mund të shitet për të përfituar fonde.
