Presidenti turk Recep Tayyip Erdogan paralajmëroi reforma rrënjësore të strukturave ushtarake si edhe një strukturë të re të komandës kryesore ushtarake në Turqi.
Në një intervistë për median lokale, Erdogan theksoi se për shkollimin e personelit ushtarak do të angazhohet Universiteti i Mbrojtjes Kombëtare, ndërsa në krye të komandës së forcave të armatosura do të jetë ministri i Mbrojtjes Kombëtare.
“Të gjitha urdhrat e forcave të armatosura, tokësore, marinës dhe forcave ajrore do të jenë nën kompetencat e ministrit të Mbrojtjes Kombëtare, jo të ministrisë, por drejtpërdrejt të ministrit. Përveç kësaj, në varësi të negociatave me opozitën, në qoftë se pranohet pakoja e ndryshimeve, planifikojmë që shefin e Shtabit të Përgjithshëm dhe atë të Shërbimit Kombëtar Sekret (MIT) ta vendosim drejtpërdrejtë nën kompetencat e presidentit”, theksoi Erdogan.
Ai njoftoi heqjen e shkollave të deritanishme ushtarake dhe paralajmëroi formimin e një institucioni ombrellë, Universitetin e Mbrojtjes Kombëtare, që do të mbledhë të gjitha degët e shkollave ushtarake dhe që do të jenë në nivel fakulteti.
“Shkollat ushtarake do të mbyllen. Paralelisht me mbylljen e shkollave ushtarake, do të hapen mundësitë për të gjithë nxënësit e shkollave të mesme dhe shkollave profesionale, që të regjistrohen në Akademinë Ushtarake. Do të krijohet Universiteti i Mbrojtjes Kombëtare, ku do të jenë shkollat e forcave tokësore, detare dhe ajrore”, tha presidenti turk.
Erdogan gjithashtu shtoi se do të bëhen disa ndryshime në shkollimin e policisë ushtarake.
“Do të formohet akademia për policinë ushtarake. Kjo akademi do të jetë një qendër që do të prodhojë kuadro serioze”, tha ai.
