Ekzistojnë dyshime se gjinekologët amë për shumën e 500 deri 800 eurove në të zezë kanë shitur ilaç vdekjeprurës, nga i cili javën e kaluar një shtatzënë mezi shpëtoi, ndërsa foshnja e saj ndërroi jetë. Ky ilaç nuk është i regjistruar në shtet, ndërsa në ato fqinje shitet për 10 deri 15 euro, thonë nga Klinika për Gjinekologji.
“Mjekët e shesin në ordinanca për 500 deri 800 euro. Ka dyshime edhe për raste tjera, por pacientet nuk e pranojnë”, tha Viktorija Jovanovska, drejtoreshë e Klinikës për Gjinekologji.
Jovanovska potencoi se gjinekologët të cilët e kanë shitur ilaçin për gruan e cila ka dashur ta ndërpresë shtatzëninë në muajin e tetë, e kanë ditur se foshnja do të vdesë, por është dashur të dihet edhe rreziku i jetës së nënës.
Ekipi kujdestar mezi arriti ta shpëtojë pacienten, e cila kishte gjakderdhje dhe ka pasur rrezik të përfundojë me fatalitet. Bëhet fjalë për një vajzë 24-vjeçare, e cila nuk ka dashur të lindë, pasi ka pasur probleme familjare, përcjell Telegrafi Maqedoni.
“Mjeku e ka ditur se foshnja do të vdesë, ndërsa ekipi kujdestar nuk e ka ditur për çfarë bëhet fjalë përderisa pacientja vetë nuk e ka pranuar. Ka pasur rrezik që rasti të përfundojë me vdekje të pacientes, ku më pas do të akuzohej gjinekologu kujdestar në Klinikë”, tha Jovanovska.
Nga Klinika thonë se pacientja e ka treguar në deklaratë emrin e gjinekologut, i cili ia ka dhënë ilaçin dhe presin që Inspektorati Shtetëror dhe Sanitar rastin ta paraqet në polici. Në Klinikë kanë njohuri edhe për raste tjera, por pacientet nuk pranojnë se kanë marrë këtë ilaç.
Përndryshe, dyshimet e para nga inspektimi që punon në rastin e katër foshnjeve të vdekura për një natë, janë se faktori njeri nuk është shkak për vdekjen e tyre.
Komisioni të enjten duhet të deklarohet edhe për përgjegjësinë e pediatrit kujdestar, i cili ka dalur nga puna dhe është kthyer kur njëra prej foshnjeve ka qenë para vdekjes.
