Presidenti Gjorge Ivanov sot i priti përfaqësuesit e Lidhjes Kombëtare e të Verbërve të Republikës së Maqedonisë, me rastin e shënimit të 70-vjetorit të themelimit të organizatës.
Presidenti Ivanov, siç kumtoi Kabineti i tij, ka shprehur mbështetje për aktivitetet e Lidhjes nacionale të personave të verbër dhe ka theksuar se edhe më tej do të angazhohet për zhvillimin e të drejtave të personave të verbër, si përmes përmirësimit të legjislativës ligjore ashtu edhe përmes zbatimit të saj konsekuent.
“Shteti dhe shoqëria në tërësi duhet të bëjnë kujdes të vazhdueshëm dhe sistematik për personat e verbër. Nevojitet qasje e përbashkët dhe e koordinuar përmes mekanizmave konkrete për zhvillimin e të drejtave të tyre dhe pozitës së tyre. Veçanërisht është i rëndësishëm edhe angazhimi i institucioneve lokale, komunave, si dhe mbështetja për familjet e personave të verbër”, ka porositur në takim presidenti i Maqedonisë.
Me rastin e 70-vjetorit të jubileut të titulluar “70 vjet Vizion për Dritë”, Lidhja Kombëtare e të Verbërve të Republikës së Maqedonisë i ndau “Plaketë të Artë” presidentit Ivanov, që është mirënjohja më e lartë e Lidhjes Kombëtare e të Verbërve në Republikën e Maqedonisë, e cila ndahet për merita të veçanta për përmirësimin e të drejtave të kësaj kategorie të qytetarëve.
