Kryetari i Kuvendit të Kosovës Kadri Veseli vlerëson se miratimi i ligjit për Trepçën është dashur të votohet shumë më parë. Ai i ka siguruar qytetarët e Kosovës dhe minatorët se ligji për Trepçën është i pakthyeshëm.
Veseli thotë se minatorët do të jenë pjesë e shoqërisë aksionare të krijuar me ligjin e ri për Trepçën.
Sipas tij, punëtorët do të pasurohen vet nga puna e tyre.
“Komuniteti do të përfitojë shumë, pastaj bilanci i jonë ekonomik. Kosova si tërësi do të përfitojë maksimalisht. Aktualisht kemi bilanc tregtar jo të mirë, prandaj Trepça do sjellë rritje ekonomike”, ka thënë Veseli.
Tutje ai ka thënë se bordi mbikëqyrës i Trepçës që buron nga ligji do të hartojë politika investuese që do të ndikojnë në nxjerrjen e xeheve dhe rritjen e eksportit të tyre.
“Ne presim rezultatet e para brenda gjashtë muajve, sepse do të ndërmerren edhe hapat e parë investues, sepse kemi edhe investitorë potencial që dëshirojnë të investojnë në Trepçë”, thotë ai.
Ndërsa sa i përket bojkotit të Listës Serbe për shkak të ligjit të Trepçës, Veseli tha se kanë ndërmarr një veprim jo të mençur.
Kreu i legjislativit tha se edhe përpjekja e Beogradit zyrtar për të reaguar ndaj ligjit për Trepçën është e pakuptimtë dhe tendencioze, por sipas tij, asgjë nuk mund ta ndalojë zhvillimin e Trepçës.