Katërmbëdhjetë trupa dhe më shumë se dy duzina qese plot me mbetje njerëzore janë gjetur jashtë qytetit meksikan të Guadalajara, thanë prokurorët e shtetit.
Sipas Al Jazeera, zbulimet, të njoftuara të enjten, u bënë gjatë 10 ditëve të fundit, në katër rajone të ndryshme në perëndim të vendit.
Siç thuhet më tej, mbetjet e 14 personave u gjetën në kufi me shtetin qendror të Guanajuato – një nga zonat më të dhunshme të vendit për shkak të grupeve kriminale të kontrabandës së benzinës.
Ndërkohë thuhet se trupat e tre burrave u gjetën jashtë një miniere kallaji, së bashku me një grua “duart dhe këmbët e së cilës ishin të lidhura”, tha prokurori, ndërsa eshtrat e nëntë burrave dhe një gruaje u zbuluan në një fermë të vogël.
Mbetjet njerëzore të futura në 26 qese u gjetën gjithashtu në Guadalajara – një nga qytetet më të mëdha të Meksikës dhe kryeqyteti i Jalisco, kanë thënë autoritetet, megjithëse nuk është e qartë se sa njerëz përfaqësojnë.
“Instituti i Shkencave Ligjore do të përcaktojë numrin e organeve”, tha prokurori i shtetit Jalisco Gerardo Solis.
Nga viktimat, vetëm dy janë identifikuar nga të afërmit, ndërsa autoritetet supozojnë se kufomat kanë qenë në ato zona për të paktën një muaj për shkak të “mumifikimit të mbetjeve”.
Deri më tani këtë vit, 115 trupa janë gjetur në të paktën 10 varre klandestine në Jalisco, shumica e tyre jashtë Guadalajara.
Shteti ka qenë skena e rritjes së dhunës gjatë pesë viteve të fundit, dhe shumë prej rasteve kanë qenë të lidhura me një kartel të fuqishëm droge, Jalisco Nueva Generacion.
