Kryeministri Mustafa: Është në interes të shtetit të Kosovës që të përcaktojë sovranitetin e tij dhe të merr përkrahjen për transformim të FSK-së në Forcë të Armatosur të Kosovës

30.07.2016 08:45:39

Kryeminstri Mustafa, nëpërmjet faqes së tij në facebook, edhe një herë u është drejtuar qytetarëve, partive opozitare, “ekspertëve-profesorë” lidhur me çështjen e demarkacionit, si një kusht i paanshkalueshëm për liberlaizimin e vizave, për forcimin e marrëdhënieve me aletatët tanë strategjikë që janë të domosdoshme edhe për transfomimin e FSK-së në Forcë të Armatosur. Në këtë postim, kryeministri i vendit, edhe një herë shpreh shqetësimin për politizimin e çështjes së demarkacionit, me qëllim bllokimin e liberalizimit të vizave dhe të proceseve të tjera të rëndësishme për vendin dhe për qytetarët e tij. Partive opozitare dhe të ashtuqajturve “ekspertë-profesorë” që po u hyn në hak shkencës së mirëfilltë, kryeminstri Mustafa ua kujton rëndësinë që ka për qytetarët e vendit liberalizimi i vizave qoftë për të lëvizur lirshëm, qoftë për arsye të mjekimit jashtë vendit etj. Shpreh habinë se si të ashtuquajturit “ekspertë-profesorë”, thonë se hartat dhe dokumentet serbe janë më të sakta se sa ato shqiptare, kurse rikujton edhe implikimim e interesave personale të atyre që kanë blerë toka të gjera dhe që sheititen me jahte në dete të ndryshme, ndërkohë që qytetarët kanë interes jetik për lëvizje të lirë për nevoja edhe më jetiket, e që kanë të bëjnë me arsye shëndetësore. Më poshtë mund ta lexoni të plotë postimin e kryeministrit Mustafa:

“Të dashur qytetarë
Sivjet kemi shansin e madh, që pas shtatëmbëdhjetë viteve nga çlirimi i vendit dhe pas tetë viteve nga shpallja e pavarësisë, të fitojmë të drejtën që edhe ne qytetarët e Kosovës të dalim nga izolimi dhe të udhëtojmë pa viza në vendet e Bashkimit Evropian. Në këtë proces na përkrahën vendet më të rëndësishme të BE-së dhe Shtetet e Bashkuara të Amerikës. Është e paarsyeshme që opozita të këmbëngulë për ta uzurpuar një të drejtë themelore të qytetarëve.
Është në interes të të rinjve që ata të lëvizin pa viza në vendet e dijes dhe shkencës; në interes të bizneseve që të kontaktojnë partnerët e tyre në tregun evropian; në interes të qytetarëve që të vizitojnë familjarët e tyre; në interes të të sëmurëve që të mos presin nga gjashtë muaj para ambasadave për të shkuar për trajtim për sëmundjet për të cilat nuk gjejnë shërim në Kosovë.
Është në interes të shtetit të Kosovës që të përcaktoj sovranitetin e tij dhe të merr përkrahjen për transformim të FSK-së në Forcë të Armatosur të Kosovës.
Të konstruktosh një të pavërtetë të madhe, se Kosova po humb 8200 hektarë, pa e dhënë edhe asnjë fakt se ku janë ata hektarë që Kosova i ka pasur me rastin e shpalljes së pavarësisë e tani po i humb, vetëm për ti bllokuar proceset e integrimeve është një grusht i madh që po i epet vendit tonë.
Ne duhet ti besojmë Komisionit shtetëror, Departamentit të Shtetit të SHBA-ve, komisionit ndërkombëtar të themeluar nga Presidentja Jahjaga, duhet tu besojmë akteve mbi të cilat e shpallëm pavarësinë.
Opozita duhet të lirohet nga kompleksi që liberalizimin e vizave dhe proceset më të rëndësishme integruese po i drejton një koalicion shtetformues, sepse me metoda të dhunës , gazit lotsjellës, mollotovit nuk mund të llogarisin se do të vijnë në pushtet dhe se ata do të jenë autorët e liberalizimit të vizave.
Edhe “ekspertët-profesorët”, të cilët thonë se dokumentet e serbeve janë më të sakta se ato të shqiptarëve, vështirë se mund të na bindin se kjo është e vërtetë. Po të ishte e vërtetë kjo, Kosovë do ta kishte ndjerë veten më mirë dhe më sigurt me Serbinë sesa e pavarur. Para se të japin të tilla deklarata, ata meritojnë të kontrollohen te mjeku, qoftë në sektorin publik apo privat. Këto shërbime ua ofron shteti.
Kur futesh në kurthin e kauzave të rrejshme politike dhe dëshiron që ato kauza ti argumentosh “shkencërisht”, atëherë shkencës i hyn fort në hak. Soji i këtyre “shkencëtarëve-profesorëve” dhe i atyre që kanë blerë prona me pak pare atje ku dëshirojnë ta qojnë kufirin dhe të pamundësojnë lëvizjen e lirë për ata që nuk kanë para të shëtitën me jahte por kanë nevojë të shijojnë liritë themelore që u takojnë, nuk meriton përkrahje.
Kuvendarët tanë marrin vendime me mendje racionale. Ata mund të jenë emocional, por nuk duhet të mashtrohen nga diletantët dhe profiterët. IM”