Grupi parlamentar i Lidhjes Demokratike të Kosovës ka reaguar sot lidhur me mbajtjen me dyer të mbyllur të mbledhjes së Komisionit për Punë të Jashtme, e ku është intervistuar një kandidat për ambasador, i propozuar nga Qeveria Haradinaj.
GP i LDK-së thotë se ky është një proces i paligjshëm dhe për këtë kanë refuzuar të marrin pjesë në këtë mbledhje.
Lexoni të plotë njoftimin e Grupit parlamentar të LDK-së lidhur me këtë çështje:
“Sot, më datë, 3 prill 2018, përfaqësuesja e AAK-së në Komisionin për Punë të Jashtme, e mbështetur nga anëtarët e tjerë të Komisionit nga radhët e koalicionit qeverisës si dhe përfaqësuesi i GDP-së, kanë mbajtur një mbledhje me dyer të mbyllura, ku është intervistuar një kandidat për ambasador, i propozuar nga Qeveria Haradinaj.
Grupi Parlamentar i Lidhjes Demokratike e Kosovës e konsideron këtë proces të paligjshëm dhe për këtë arsye Kryetarja e Komisionit për Punë të Jashtme, deputetja Vjosa Osmani dhe anëtarja e këtij komisioni deputetja Doruntinë Maloku, kanë refuzuar të marrin pjesë në këtë mbledhje dhe të bëhen pjesë e shkeljeve ligjore.
Neni 7.7i Ligjit për Ministrinë e Punëve të Jashtme dhe Shërbimin Diplomatik të Republikës së Kosovës kërkon që së paku 50% të të emëruarve si shefa misionesh të jenë Ambasadorë të karrierës, ndërsa pjesa tjetër të jenë të emëruar politik. Meqenëse përqindja e të emëruarve politikë në Ambasadat e Kosovës anekënd botës tashmë është tejkaluar dhe arrin në rreth dy të tretat , gjë të cilën e ka konfirmuar edhe vet Ministri i Jashtëm, z. Pacolli, përfaqësueset e LDK-së në Komision, kanë propozuar që mos të ketë emërime të reja politike derisa të rregullohet kuota prej 50/50, e kërkuar me ligj.
Po ashtu, Grupi Parlamentar i LDK-së konsideron se nënshkrimi i rekomandimeve të tilla nga ana e Presidentit të Kosovës, bie ndesh me ligjin dhe tejkalon kompetencat e tij kushtetuese.
