Ushtari i Shullazit”. Ky është etiketimi që i bëri sot deputetit socialist të Durrësit, Jurgis Çyrbja, kolegu i tij demokrat Ervin Salianji nga selia blu, teksa kërkoi reagimin e Prokurorisë pasi ai është përgjuar në biseda telefonike me bandën e kriminelit famoz, kur negociohej për çështjen e “Hotel Vollgës”.
Salianji shpërtheu në akuza edhe ndaj kryeministrit Edi Rama, duke e akuzuar atë për heshtjen e gjatë mbi këtë çështje, ndërsa për Jurgis Çyrbjan tha se mashtroi dje shqiptarët dhe u përpoq t’u hidhte hi syve për të shpëtuar veten.
“Prej 24 orësh media ka bërë publike përgjimet e prokurorisë, ku deputeti i Edi Ramës në Shijak, Jurgis Çyrbja, faktohet si anëtar i bandës së Emiljano Shullazit dhe bashkëpunëtor për rregjistrimin e pasurive të paluajtshme në emër të tij. Shqiptarët duhet ta dinë që, nëse Edi Rama do të lejonte kukullat e veta në Prokurori të zbatojnë ligjin, në Kuvend duhet të kishte shkuar kërkesa për arrestimin e menjëhershëm të deputetit Jurges Çyrbja, anëtar i bandës së Emiljano Shullazit”, tha Salianji.
Sipas deputetit të PD, “është e papranueshme sesi nga Prokuroria nuk ka asnjë reagim për komunikimet e përgjuara në mënyrë të ligjshme prej saj, ku deputeti i Edi Ramës ka komunikuar të paktën dy herë në telefon me Gilmano Danin, krahun e djathtë të Emiljano Shullazit për çështjen e Hotel Vollgës”.
“Kjo pronë është regjistruar në pronësi të Emiljano Shullazit nga Jurgis Çyrbja, por ndryshe nga Shullazi që është në burg, Çyrbja është në parlament nën mbrojtjen e Edi Ramës. Edi Rama, njësoj si prokuroria që ka në varësi, hesht prej 24 orësh”, tha më tej deputeti demokrat.
Në vijim Salianji me ironi pyet: “Pse e ka kyçur gojën Rama, i cili komenton edhe fustanet e grave, por jo lidhjet e deputetit të tij të Shijakut me bandën e Emiljano Shullazit?!”
Dhe përgjigjen deputeti demokrat e dha po vetë, duke akuzuar kreun e qeverisë për lidhje personale me krimin që e pengojnë t’i lejojë drejtësisë të burgosë “të vetët”.
“Edi Rama nuk flet për të dënuar lidhjet e krimit me politikën, sepse ai është arkitekti i bashkëqeverisjes me krimin, i cili e mban në pushtet. Kështu po mbron Rama Saimir Tahirin, Fatmir Xhafën, Vangjush Dakon, Qazim Sejdinin, Damian Gjiknurin, Mark Frrokun, Arben Ndokën, Armando Prengën dhe çdo lidhje të krimit brenda dhe jashtë parlamentit”, nënvizoi ai.
