Policia në qytetin amerikan, Sharlotë në Karolinën Veriore, e ka publikuar videon ku shihet vrasja e një personi zezak, javën e kaluar.
Policia, po ashtu, i ka publikuar 24 fotografi të revoles dhe marihuanës, që policia thotë se i ka poseduar personi i vrarë, Keith Scott.
Oficeri i policisë, po ashtu, afrokano-amerikan, e ka qëlluar për vdekje personin Scott, më 20 shtator, duke shkaktuar protesta të dhunshme.
Familja e të vrarit thotë se ai ka pasur libër e jo armë.
Por, shefi i policisë në qytetin Sharlotë, Kerr Putney, tha se ai kishte “absolutisht në posedim revole”.
Putney, po ashtu, tha se Scott, 43 vjeçar, kishte kryer edhe krim tjetër, për të cilin ai nuk ka elaboruar më tepër.
Në një video të xhiruar me telefon nga bashkëshortja e të ndjerit Keith Scott, ajo dëgjohet duke u thënë policëve se ai nuk ka revole.
Kjo vrasje ishte e fundit në vargun e të shtënave fatale të policisë në gjithë Shtetet e Bashkuara dhe ka shkaktuar tmerr dhe debate të ashpra për racën, varfërinë dhe raportet policore.
