Korça është lëkundur sërish nga tërmeti. Dy lëkundjet kanë qenë të shkallës 3.6 dhe 3.9 të shkallës Rihter, bën të ditur Shqiptarja.
Korça nuk ka gjetur qetësi nga lëkundjet e tërmeteve edhe pse kanë kaluar disa javë që nga lëkundje e para që shkaktuan dëme të mëdha në disa fshatra. Ditën e sotme ka pasur dy lëkundje të fuqishme njëra pas tjetrës në zonën e Korçës.
Lëkundja e parë ka qenë 3.6 ballë i shkallës Rihter dhe ka rënë në lindje të Nikolicës në Korçë. Thellësia e tërmetit të parë mësohet se ka qenë rreth 10 km.
Ndërsa lëkundja e dytë ka qenë 3.9 ballë i shkallës Rihter. Epiqendra ka qenë në Jug Lindje të Drenovës në Korçë. Lëkundjet janë ndjerë dhe në fshatin Floq dhe Qafzez.
Kujtomë se banorët e të dy këtyre fshatrave prej disa javësh kanë braktisur banesat e tyre dhe po qëndrojnë në çadrat dhe ambientet e krijuara nga Forcat e Armatosura shqiptare dhe të Emergjencave Civile.
Ndërkohë për sa u përket banesave të prishura nga lëkundjet e tërmeteve, qeveria ka premtuar se do të dëmshpërblehen të gjithë. Në këtë nismë janë përfshirë edhe bashkitë e drejtuar nga PS.
