Lidhja Demokratike e Kosovës do ta votojë ligjin për transformimin e Forcës së Sigurisë së Kosovës në Ushtri.
Kështu ka thënë nënkryetari i këtij subjekti, Lutfi Haziri, i cili ka shtuar se pret qe të gjitha partitë politike në Kosovë të votojnë pro rritjes se kapaciteteve të FSK-së.
“Është momenti i duhur dhe koha fundit kur të gjitha partitë politike dhe Kuvendi të bashkohen për ta fuqizuar FSK-në. Definitivisht LDK do ta mbështesë, dhe është koha e fundit qe Forcat e Armatosura të Kosovës më i marrë atributet e ushtrisë”, ka thënë Haziri
Haziri ka thënë se institucionet e Kosovës janë në koordinim të plotë me shtetet anëtare të NATO-s sa i përket këtij projektligji.
“Unë besoj se kryeministri me kryetarin e Kuvendit dhe presidentin janë autoritete qe koordinojnë edhe me shtetet partnerë dhe shtetet anëtare të NATO-s lidhur me këtë ligj”, ka thënë Haziri.
Sot, presidenti i vendit, Hashim Thaçi, ia ka proceduar edhe zyrtarisht kryetarit të Kuvendit, Kadri Veseli, projektligjin për transformimin e FSK-së.
Nesër pritet të mbahet mbledhja e Kryesisë, ku do të vendoset se kur do të votohet projektligji në fjalë.
Për miratimin e këtij projektligji nuk nevojiten më shumë se 61 vota.
