Duke marrë parasysh se Tribunali Hagës ka një siguri të nivelit shumë të lartë, shtrohet pyetja se si ka mundur gjenerali kroat Praljak të fuste diçka brenda gjykatës.
Pasi që dëgjoi aktgjykimin me të cilin u dënua me 20 vjet burgim, gjenerali Slobodan Praljak piu diçka prej një shisheje të vogël, e që besohet të jetë helm, u ul në karrige dhe menjëherë dukej se filloi të ndjente dhimbje.
Një njeriu që e ka përjetuar një proces në këtë Tribunal, Vojislav Sheshel, ka bërë të ditur mënyrën e vetme si ka qenë e mundur të futet shishja e vogël brenda.
“Kontrolli është i rreptë edhe kur të sjellin, edhe kur të largojnë prej aty, të heqin edhe këpucët. Edhe unë pyetem se si mundi të fuste diçka. Nuk besoj se ajo iu dorëzua në gjykatore. Mënyra e vetme si ka mundur të fuste shishen e vogël është nëse e ka lidhur për organe gjenitale. Sepse kjo është pjesa e vetme e trupit ku nuk të preknin”, ka shpjeguar Sheshel.
Praljak është një ndër 6 kroatët që po gjykohen në Tribunalin e Hagës, për krime luftë në Bosnje e Hercegovinë.
