Qeveria po refuzon të përjashtojë vendimin për mbylljen e të gjitha qyteteve, nëse Britania e Madhe përjeton një shpërthim të gjerë të coronavirusit.
Matt Hancock është sekretari i shëndetësisë, që ka thënë se në këtë fazë “nuk do të heqim asgjë nga tavolina”, kur është pyetur nga gazetari i BBC-së për karantinën në stilin e Wuhanit të Kinës.
“Do të ishte një dobësim i madh ekonomik dhe social, por ne nuk do të donim të hiqnin asgjë nga tavolina në këtë fazë, sepse duhet të sigurohemi që i kemi të gjitha mjetet në dispozicion, nëse kjo është ajo që kërkohet”, ka thënë Hancock.
“Në këtë fazë ende ka shpresë dhe megjithëse në shtete tjera numri i të prekurve po rritet, ne mund ta minimizojmë përhapjen dhe ta ndalojmë infektimin”, ka shtuar ai.
Sipas një hulumtimi në të cilin është bazuar ai, thuhet se nëse kjo pandemi e përfshinë Britaninë e Madhe, gjysmë milioni njerëz mund të vdesin në Britani të Madhe, si “skenari më i keq i mundshëm”.
Qeveria po konsideron ndalimin e tubimeve publike dhe ndeshjeve të futbollit, mbylljen e shkollave dhe inkurajimin e njerëzve për të shmangur transportin publik.
Gjatë ditës së sotme, është gjetur se edhe tre persona tjetër janë të sëmurë me coronavirus, duke e ngritur në 23 totalin e të sëmurëve në Britani të Madhe.
Deri më tani, raportohet se 2,982 njerëz kanë vdekur dhe 87,208 të tjerë janë të infektuar nga coronavirusi në mbarë botën.
